[生產記] #somephreyb出世了!



上回提要 <<< 

38week3days
嗰晚只係諗住「丫,都好耐冇影過肚相喇,影番張先」就去訓
點知凌晨3點鐘個肚開始痛,同feel到下面有少少濕…H先生望左一眼就覺我係見紅
跟據醫生之前同我地講 3個產前特徵 《陣痛、見紅、穿水》
只要未穿水都仲可以拿拿林去沖涼洗頭,咁H先生都叫我快快趣去沖左先
之後沖完出黎,feel到個痛開始真係有pattern咁隔5-10分鐘就黎一次,而且開始越黎越痛
4點左右我地決定打比醫生個emergency mobile,佢聽完我地個情況就叫我地入院check下



Call左車,4點三出門口,未到5點去到醫院
上左去就比姑娘check下,原來已經開左一度…
好在係私家醫院,唔係開得一度真係分分鐘會叫你番屋企等
咁之後被推左入去病房繼繽等佢開多d (呢個process有人好短,有人可以長到十幾個鐘)
好記得睇住天光,開左電視睇岩岩係「香港早晨」
我已經開始痛到頂唔住,想要開始做epidural…
姑娘見我面容扭曲再黎check下,都只係得兩度orz



確定左我真係想proceed with epidural之後
我就換衫,被推上輪椅推過去產房了⋯⋯
一上產房張床再check好似已經開到三度
初頭D姑娘仲好似好relaxed咁,H先生話個護士長好似仲問緊周圍其他人食左早餐未
仲話唔駛咁多姑娘陪我等只要有一個就夠晒啦(我估佢地以為我應該係有排等)
跟住有D姑娘見我嗌到出面都聽到咁大聲,就開始比Laughing Gas我聞
嗰刻索索下我真係以為自己痛到暈左…
因為我個腦入面只係不斷重覆緊H先生同我講「放鬆D 放鬆D 放鬆D⋯⋯(回音)」

<<<呢度之後好多都係H先生之後同我講番的,我一係痛到傻左,一係索氣索到wing左>>>

只係隱約聽到有姑娘同我講「醫生同麻醉師黎緊救你架喇!」
之後隔左唔知幾耐,醫生終於黎左換緊套裝甲,姑娘Check再多一下就話我已經開到一半有多
我痛到係咁大嗌但係比姑娘好話,叫我唔好晒氣留番陣間用力好過⋯⋯(嗚呀)
因為本身BB胎位仲係好高,加埋仲未穿水

我應該係一直痛到癲左咁嗌「我唔理啊,快D比Epidural我呀~」
然後醫生話⋯「你都開左咁多,再等麻醉師黎set up半個鐘得黎你都生得喇,咁仲叫唔叫佢黎好呀?
H先生就喺呢個時候同醫生講「我同佢做決定,唔駛麻醉師黎喇」
嗚鳴⋯⋯就係咁我就踏上左我呢個冇無痛的生仔之路了(明明已經行左一半有多⋯)

呢個時候醫生話穿水的話最後嗰幾度會開得快d
之後佢用左支野一篤,我就feel到好似真係瀨尿咁有一攤暖水流左出黎

之後其實痛係個Contraction變得更為劇烈,D姑娘就開始叫我push
一開始其實我get唔到個節奏,係唔係都推一餐
但係正確應該係個子宮一收縮嘅時候先至用力推的
推推下開始冇力,之後BB個心跳機開始響Alarm (驚)
醫生就問H先生基於「BB心跳唔係咁好,可唔可以同太太做緊急開刀?」

H先生就話比我試推多一兩下,然後喺我耳邊講「而家食唔食全餐就睇你喇」
呢句野好似有魔法咁,令我真係有進展左,再推多兩下Pecan BB個頭同一邊手就出左黎
但係我仲係唔太夠力,醫生repeat住一句「嗱!太太要努力呀,BB要出世架喇」

醫生見到冇咩進展就問H先生可唔可以用吸盤幫幫手…
等緊醫生set up緊嘅時候,我真係痛到頂唔順就大嗌「我唔得喇!!!」
然後成班姑娘五個人異口同聲「唔得都要得架喇!!!」
再推多兩下,醫生以為我偷懶就講「個吸盤只幫到兩成力,八成要靠返媽媽架,加油呀!」

本身淡定嘅護士長好緊長咁問「兒科去到邊呀?」另一個姑娘答「On the way囉」
護士長:「On the way 即係未到啦!有冇兒科巡緊房呀?搵個人上樓上搵醫生啦!!!」

一拉左Pecan BB出黎,D姑娘擺左佢喺我心口
但我係完全未回魂所以完全唔知道(!!!)
因為拉左bb出黎,個monitor又睇唔到個心跳,佢又未識喊
H先生形容嗰刻係真係好擔心好驚,到d姑娘幫bb吸左d痰出黎佢先識得開始喊
全體醫護人員終於鬆左一口氣
姑娘清潔完bb另一位兒科醫生就到達現場,叫左H先生過去聽佢同bb做初步評估
而我開始有番d意識之後,聽到Pecan BB嘅喊聲已經係喺一段距離外傳過黎
姑娘同Pecan BB輕輕清潔完同wrap好佢之後就抱番佢過黎比我



嘩真係就黎虛脫咁嘅樣,一聽到要影相就點都睜大隻眼比番個精神樣出黎
(但同時間醫生仲喺度縫緊個傷口…)到咁上下攪掂醫生同我講多兩句
我就比姑娘推左番去自己間房了…好記得我講左一句「可唔可以唔好郁我由我訓喺度啊」

因為Pecan bb太快就出左黎,攪到個肺有少少水所以兒科醫生建議要訓暖箱加聞氧氣
亦因為我一出黎都吊住鹽水,攪到要吊完成包水到夜晚先可以去到nursery摸到Pecan BB :(



好彩我同佢嘅進展都好好,第二日我已經可以入去試下埋身餵 :)
個感覺真係好surreal,完全冇諗過呢個bb一日之前仲喺我個肚入面
一開始其實有d難去relate佢係自己嘅bb,好似反而似係玩緊人地個bb咁
但係做媽媽呢樣野真係好得意,到我而家再打番件事出黎,個感覺已經好唔同了。



起初揀醫院的時候,只係考慮養和同仁安
最後都係揀養和的原因都係因為我個obgyn醫生住喺跑馬地
結果諗番起真係揀得冇錯,因為我地凌晨三更半夜入院
再要去佢大圍的話,分分鐘塞一下車我都可能生左了

第三日bb唔駛再訓箱,仲可以推入房比我埋身
我係順產的關係,obgyn同兒科各自evaluate我同Pecan BB的情況後
我地呢日就已經可以一齊出院了 :)



雖然已經榮升b媽,不過我希望呢個blog唔會flooded with baby stuff而悶親大家啊~
有準媽媽路過有問題的話,亦可以隨便問任何野呀!

Cheers :)

2 Comments:

  1. 恭喜你呀!!! 冇見一排就做左媽媽,好開心呀!!!

    回覆刪除
    回覆
    1. 多謝你呢vivi,haha我之前都收得好密 ;)

      刪除

 

連續追看中

WINSOMESOME


人妻一名。番工的理由係為左去食同去旅行。係女人都鐘意買野, 不過近年怕同人迫所以敗家都轉向網購去。名字Winsome的由來純粹是因為讀音似自己的中文名。介紹自己時經常被人誤會我的名字是Vincent,為免麻煩以後總是說:「我係"贏小小"呀!」。

Just a place for my little ramblings.
聯絡請電郵emosniw[at]gmail.com
FB page @winsomesomething